A alumna Amalia Blanco Pose dobremente premiada!

 

Neste cartel temos o nome da nosa alumna de 1º de bacharelato Amalia Blanco Pose. Que significa iso? Pois que ven de gañar un concurso de poesía na súa categoría e participará recitando o seu poema xunto a outras e outros poetas o vindeiro martes 21 de marzo, xusto o Día Internacional da Poesía. Amalia participou no I Certame de poesía Respira, impulsado polo Festival Alguén que respira na súa VI edición. Preto de cen traballos centrados no tema Cambios de clima e legados culturais da vida foron os que se presentaron, e catro os premiados, entre os que está o de Amalia. Parabéns á nosa alumna!!!!!

O xurado estivo formado por Iris Cochón, Anxos Sumai e Soedade Noia xunto ao director do festival Antón Lopo. Nesta edición a ecopoesía como estratexia contra o cambio climático é o eixe do festival que comezará o sábado 18. Segundo di na web as entradas serán de balde até esgotar o aforo mais antes haberá que retiralas en www.compostelacultura.gal ou no despacho de billetes do Teatro Principal de Compostela, cando as poñan á nosa disposición.

Ademais de gañar este premio, Amalia acadou un accésit nos Premios Literarios Minerva (edición nº 51) na categoría de poesía co texto titulado Folgando en cinsa. Soubémolo onte pola prensa compostelá que recolleu os nomes das persoas galardoadas. 

Esta iniciativa do colexio M. Peleteiro busca desde hai 51 anos fomentar o uso da lingua no ámbito educativo tanto en narrativa como en poesía. 

Estamos seguras de que Amalia estará moi contenta con estes recoñecementos e agardamos que queira presentarse de novo ao noso IX Concurso Literario polo Día do Libro, despois de obter o 1º premio na 2ª categoría na pasada edición. Dicímosvos xa que en breve serán convocados!!

Moitos parabéns a Amalia de todo o equipo da biblioteca do IES Terra de Xallas!!!