A biblioteca procura voluntari*s

 Que vos parece colaborar coa biblioteca? Procuramos un equipo que participe nas actividades da biblioteca facendo propostas, aportando ideas, facéndoas realidade...

Queremos que a fagades vosa  e que poñades a carón dos libros as ciencias, a arte, o debuxo, o teatro... o que se vos ocorra.

Comezamos o novo curso con PAPIROFLEXIA

 

 

Comezamos o novo curso con actividade na biblioteca do instituto. O alumnado de 1º ESO, novo no centro, tivo unha sesión de formación de usuarios en que, ademais de coñecer os recursos da nosa biblioteca in situ, recibiron unha 'Guía de uso' para non esquecer o aprendido. Velaquí:

 

Ademais tiveron un obradoiro de papiroflexia con Teresa Otero, unha coñecida profesora de matemáticas apaixonada do ensino e desta arte e ciencia. Podedes ler unha breve entrevista publicada nun xornal galego o pasado mes de abril aquí. Nela cóntanos, entre outras cousas, a cantidade de figuras de papel que ten realizado ao longo dos anos. Sorprenderavos todo o que pode facer cun papeliño!

Na biblioteca, Teresa explicounos que significaba a palabra e como se dicía en xaponés, ORIGAMI. Ensinounos moitas figuras preciosas e fixemos un lapis, unha caixa, un marcapáxinas, un lapiseiro... Foi unha xornada intensa e divertida!

Mais...aínda estará con nós a vindeira semana para nos descubrir onde está a xeometría dos folios, os ángulos e as rectas dos pedaciños de papel cos que facer incríbeis figuras.

 

 

Feliz verán de lecturas!

 

Xa estamos a nada de rematar as aulas e a biblioteca anímavos a escoller lecturas para este verán. Podedes vir por aquí e escoller entre os andeis das estanterías, libros ou películas, podedes preguntar no mostrador para que vos aconsellen, se non sabedes ben que podedes escoller. Outra opción, perfectamente compatíbel con estas, é entrar na Plataforma de Lecturas Dixitais a través do móbil, da tablet ou dun ordenador, e escoller alí o que queredes ler. Ademais están promocionando isto:

Así que non deixedes de indagar nesta biblioteca online nesta ligazón, e pasade pola biblio antes de acabar o curso a buscar as vosas credenciais de acceso.

Tedes unha explicación de como utilizar a plataforma neste outro enlace, ou no lateral do blog.

Feliz verán de lecturas!

Lecturas para o verán

 Agora que están achegándose as vacacións de verán, a biblioteca faivos varias propostas de lecturas. E a primeira é esta, sobre ciencias. Porque tamén podemos gozar con libros que nos conten 'cousas' sobre natureza, animais, plantas, sobre fenómenos físicos ou problemas matemáticos, mais tamén con libros que nos falen de filosofía, de música, de economía, de historia ou de socioloxía. E máis no verán que temos tempo para todo!

E...se as propostas non atinan cos teus gostos, xa sabes...pasa pola biblio a buscar outras lecturas!!! Seguro que atopas o que queres ler!!!

Agardámosvos!!

Non esquezades que tamén podedes buscar libros para gozar na plataforma E-LBE.

Mais antes debedes pasar pola biblioteca para conseguir as vosas credenciais de entrada. Lembrádeo!

Textos e ilustracións premiadas nos concursos do Día do Libro

 

O pasado martes fixemos entrega dos diplomas ás gañadoras e gañadores dos premios nos concursos Literario e de Ilustración Día do Libro 2023. Só faltaba unha premiada de 2º de Bach., que anda atarefada coa ABAU!!

O agasallo, que xa sabedes que consiste na publicación dos textos e ilustracións premiadas, vai tardar un pouquiño, mais podedes ir vendo como van quedar no arquivo que ven debaixo. 

O que si podedes é pasar por LaRepro ou por PC+ a gastar os vosos bonos. Lembramos que os 1º premios gañaron 50 euros, os 2º premios gañaron 30 euros e os accésit gañaron 20 euros. Tedes de prazo até o 30 de setembro, mais debedes gastar un bono íntegro nun dos comercios.

Faremos unha exposición dos traballos premiados na entrada do edificio principal, que quedará até comezar o próximo curso. Os demais traballos podedes recollelos na biblioteca. Grzas a todas e todos por participar!!

De novo parabéns a todas e todos!!!

 

Avaliades a biblioteca?

 Que vos parece avaliar tanto a biblioteca como as súas actividades nestes cuestionarios? Animádevos a responder estas sinxelas preguntas e premer en enviar ao final! Agradecémosvos as vosas suxestións para mellorar o vindeiro curso.

 

17 de maio, Día das Letras Galegas.

 

 

Neste ano 2023 cúmprense sesenta anos celebrando o día das Letras Galegas. E sabedes quen foi un dos promotores? Francisco Fernández del Riego (1913-2010) propuxo, xunto a outros académicos, a creación dunha "xornada oficialmente adicada a honrar os nosos libros" o 17 de maio. Querían celebrar unha festa reivindicativa da cultura, da lingua, da identidade galega, e o libro era daquela, 1963, o símbolo dese prestixio.

No sesenta aniversario desta celebración a Real Academia Galega honra a súa figura, a dun "activista da cultura galega e de Galicia como nación que nunca se rendeu", en palabras do Presidente da RAG, Víctor Freixanes.

Mais, quen foi? Tedes na biblioteca varias obras da súa autoría (Galicia, As peregrinacións xacobeas, Pensamento galeguista do século XIX, Pensamento galeguista do século XX e Historia da literatura, ademais de algún vocabulario) e dúas biografías que volo presentan de forma amena.

Tamén hai moito material dixital que vos vai axudar a coñecer mellor todo o que fixo este escritor, xornalista e editor, que participou en varios proxectos do grupo Nós e do Seminario de Estudos Galegos, e foi un dos fundadores da Editorial Galaxia e da revista Grial.

Na web da RAG tedes unha biografía escrita en 3 actos por Eva Mejuto e ilustrada por Lucía Cobo titulada "As cousas de don Paco", que vos recomendamos ler.

 

 

 

Hai outras máis extensas como a que está no Álbum de Galicia do Consello da Cultura Galega de Malores Villanueva ou a da propia Academia, realizada por Ramón Nicolás. 

 

Tamén podemos ver varios vídeos que nos explican en 6 capítulos toda a súa contribución á cultura galega.

 

 

Mais se preferides xogar tedes varias propostas no portal Primavera das Letras. Que vos parece comezar por 'Ánxel Casal e o libro galego'? Foron amigos e Del Riego escribiu un libro para renderlle unha homenaxe polo seu labor, despois de ser asasinado Casal polos golpistas no 36. E falando de libros, o autor homenaxeado nestas Letras tivo un papel fundamental na creación e dirección da Biblioteca Penzol (en Vigo), chegando a ceder uns 30.000 volumes da súa propia biblioteca.

Coñecer a obra deste autor faise difícil, pois "A súa sinatura está presente en máis de 150 monografías, traballou como prologuista, editor literario ou tradutor en case un cento de títulos e asinou máis de 4.000 colaboracións en publicacións periódicas." Cultivou o ensaio sobre a cultura e a literatura galegas, estranxeira e a literatura de viaxes. Redixiu varias biografías, deu ao prelo dúas antoloxías poéticas e editou varios vocabularios galego-castelán. Se queredes ver unha listaxe completa, mirade aquí.

Nós queremos salientar dúas facetas súas: por unha banda, Fernández del Riego mantivo sempre unha activa correspondencia con diferentes figuras do panorama intelectual e político da súa época nun extenso epistolario. Por outra banda hai que resaltar o seu labor como divulgador da cultura galega na radio inglesa BBC, no programa 'Galician Programme', desde 1947 até 1956. Foi a primeira programación estábel no noso idioma. Mostra tamén do seu labor radiofónico foron as colaboracións semanais que mantivo no Diario Cultural da Radio Galega nos anos 1991 e 1992.

Estes días pasados o  EDLG en colaboración coa Biblioteca propúxovos un concurso de podcast, 'A miña contorna', para coñecerdes a relevancia deste persoeiro e a súa obra. Esta Semana das Letras saberemos que crónicas obteñen premio. Sorte a todas!!