8M: Día Internacional das Mulleres

 

A vindeira semana a biblioteca proponvos celebrar o 8M cunha actividade de micro aberto. Podedes cantar ou tocar unha canción, ler un poema (voso ou dunha poeta que vos guste), contar un conto ou unha historia real, ler un fragmento dun libro ou deixar un lema, botar un aturuxo ou representar un pequeno monólogo ... todo cunha única condición: QUE VALORE ÁS MULLERES OU QUE DENUNCIE UNHA DESIGUALDADE COAS MULLERES.

Xa temos dúas persoas que se animan a facelo. Quen son? Pois ... Beatriz de Día por unha banda, e pola outra El Cos. Collerán o micro uns minutiños de algún dos recreos dos días 9 e 10, xoves e venres, e seguro que nos van sorprender!!

Para que todas as persoas que queirades participar poidades facelo, será preciso anotarse cun pouco de antelacón na biblio, así poderemos organizarmonos moito mellor.

 Ademais non esquezades que na biblio tedes propostas de lecturas feministas, onde as mulleres son as protagonistas e/ou as autoras.

Como este curso escribimos a biblioteca de todas as formas posíbeis, queremos facelo tamén coa música. Porén, deixámosvos as seguintes ligazóns a cancións para escoitar e ler (se premes nos subtítulos) neste 8M:

L’hymne des femmes

Habelas hainas: Hymne des femmes

Tanxugueiras: Seghadoras 

Ses: E ti, só ti

Fillas de Cassandra: Lisístrata 

Uxía: As nosas cores 

A banda da loba: Pepa 

Guadi Galego: Penélope 

A banda da loba: Anagnórise 

Mercedes Peón: Linguas elementais 

Fillas de Cassandra: Antígona 

Habelas hainas: Sete mulleres 

Fillas de Cassandra: Acrópole 

A banda da loba: Tribo 

Ses: Labregha berghantiñana 

Gloria Gaynor: I will survive

Ethel Smyth: The March of the Women 

Pensade nalgo e animádevos a coller o micro!!!

 

As Bibliotecas Escolares sumámonos á campaña Por un mundo dixital inclusivo promovido pola ONU Woman.

VI Concurso de Fotografía

A Biblioteca comeza o ano 2023 aconvocando a VI edición do Concurso de Fotografía. Este curso, co lema ‘Os Dereitos Civís’ proponvos tres textos tirados das palabras pronunciadas por Martin Luther King Jr. o 28 de agosto de 1963 en Whashington, ao final da Marcha polo Traballo e a Liberdade que reuniu a varios centos de miles de persoas maioritariamente negras que, convocadas por diferentes sindicatos, organizacións civís e relixiosas, reivindicaban, de forma pacífica, o final do racismo e das discriminacións contra a poboación negra de Estados Unidos: reclamaban igualdade e liberdade, reclamaban dereitos civís para a poboación negra. Podedes ver aquí un vídeo do Arquivo nacional de USA sobre como se organizou esta grande manifestación.

Hai 60 anos que Martin Luther King pronunciou ese discurso que coñecemos co título de I have a dream / Teño un soño. Neste enlace podedes ver ese momento. Foi un discurso que acadou moito éxito chegando a ser un himno para as persoas oprimidas de todo o mundo.

Ao ano seguinte, en 1964, o entón presidente Lindon B. Johnson aprobou a Lei de Dereitos Civís, prohibindo a segregación racial. En 1965 tamén asinou unha lei que permitía votar á poboación negra estadounidense.

Mais, que son os dereitos civís? Pois son os dereitos que garanten as nosas liberdades fundamentais e a nosa participación en liberdade e igualdade na vida social e política. Explícao moi ben esta ligazón á web dunha organización internacional que traballa para que se respecten estes e outros dereitos en todo o mundo.

E cales son eses dereitos? Algúns exemplos son o dereito a non ser sometida a tratos degradantes, o dereito á liberdade de pensamento ou de opinión, o dereito á xustiza ou á privacidade, o dereito á protección das e dos menores, o dereito á igualdade, etc. Podedes atopalos todos no documento  ‘Pacto Internacional de Dereitos Civís e Políticos’ que as Nacións Unidas aprobaron en asemblea en 1966 e, a día de hoxe, ratificaron 173 países. Tedes ese documento en inglés, en galego e en castelán.

Para o concurso de fotografía escollemos tres fragmentos en inglés do discurso de Martin Luther King Jr. Se precisades axuda para entendelos ben podedes ler o discurso completo en portugués, en francés e en castelán.

Para rematar deixámosvos unha das cancións coas que o músico e poeta Bob Dylan, premio Nobel de Literatura en 2016, pechou a manifestación.

Animádevos a participar!!! Consultade as bases ou preguntádenos na biblio se tedes dúbidas!!! O prazo remata o 31 de xaneiro!

Tamara Andrés no Recuncho da Tinta Violeta

 Hoxe a escritora e tradutora Tamara Andrés estivo falando do seu libro Irmá paxaro coas alumnas do club de lectura O Recuncho da Tinta Violeta. Un libro finalista no I certame de literatura xuvenil María Victoria Moreno. Tamén impartiu un obradoiro de creación literaria do que saíron textos ben interesantes. 

Todo un luxo escoitala e participar na actividade seguindo as súas propostas...como a de facer tamén... un paxaro azul?...

 

No medio da miña propia espiral

fun envexa, corrosión e,

cando me dei conta, 

intentei xirar sobre min

co fin de atopar o meu comezo,

mais só me retorcía, perdida: 

nada tiña inicio,

tampouco fin,

deviñera eterna. 

Estes son versos da súa obra Nenaespiraes coa que gañou en 2015 o Concurso de Poesía O Facho. Un libro en que se recollen composicións sobre a súa concepción do mundo. Ese mesmo ano publicara a novela Amentalista, un particular homenaxe a René Magritte, que en 1946 deu a coñecer 'O manifesto do amentalista'. 

No blog de Tamara Andrés, Temps oubliés, podedes ler un fragmento, ademais de ter información de toda a súa obra e proxectos. Nós destacamos algunhas.

Xogos surrealistas é un conxunto de poemas publicados no libro Premio 2014 de relato, poesía e tradución da Universidade de Vigo. Está en Xerais e é do ano 2014.

Corpo de Antiochia, publicada en 2017 por Galaxia, quedou finalista no certame de poesía Miguel Hernández. En 2019 publica Bosque vermello en Positivas.

Tamara Andrés tamén publica en formato dixital. La metafísica del circo é un proxecto fotográfico e de creación literaria do que é coautora xunto a Natalia Luz Striccoli Gozza. Colabora na plataforma de traducións Sagas e na revista dixital/gabinete de curiosidades La piedra de Sísifo.

Foi guionista da curtametraxe 'Tiempos olvidados', que podedes ver aquí.

E se tedes interese en coñecer o seu labor como tradutora, podedes ler Bruxas a morta de Georges Rodenbach na Biblioteca Virtual de Literatura Universal en Galego. Tamén atoparedes na editorial Kalandraka outras traducións súas.

25N: lecturas sen violencias contra as mulleres

 

Comezamos o día 25 de novembro lendo nas paredes da entrada principal ao noso centro as vosas palabras, as vosas denuncias en forma de lemas e de microrrelatos, actividades promovidas polos Departamentos de Filosofía e de Lingua Galega / EDLN. Desgarradoras, estremecedoras, tristes as pequenas historias que contades, mais tamén transmitindo denuncia, desexo de que desaparezan da nosa sociedade, valentía ao contalas.

Na biblioteca seleccionamos algunhas lecturas, de non ficción e de ficción (que puidestes ver tamén no instagram da biblioteca).

 

Novembro, mes da ciencia en galego na nosa biblioteca

 

 

Comezamos novembro facéndovos dúas propostas de lecturas: unha informativa e outra de ficción. Como podedes ver no instagram da biblioteca. As dúas, con algo en común, o tema: a ciencia; e a lingua, en galego. Comezamos así a propoñer ao alumnado e ao profesorado celebrar este mes: Novembro, mes da ciencia en galego nas bibliotecas escolares. 

 

 

Ademais promovemos a elaboración de pequenos vídeos en galego sobre variados aspectos de diferentes ciencias entre alumnado e exalumnado do centro, así como tamén de alumnado de mestrados das universidades galegas. Podedes velos nas seguintes ligazóns ou premendo no vídeo correspondente:

   Matemáticas e Filosofía

Xeografía

Latín e Botánica 

Linguaxe

Psicoloxía

Sumámonos así á iniciativa da Asesoría de Bibliotecas Escolares de Galicia. Este curso cun manifesto de José Tubío, investigador da USC, que podedes ler máis abaixo.

Club de Lectura das Familias

 

Despois dunha xuntanza informativa inicial, o Club de Lectura das Familias teremos a 1ª reunión o vindeiro luns 14 de novembro ás 17:30 na biblioteca do centro. Falaremos de "Ollos de auga" de Domingo VIllar.

 

Epitafios premiados

Xa temos epitafios gañadores! Cinco obtiveron un premio e todos teñen un agasallo agardando na biblioteca. Foi difícil decidir, mais o xurado emitiu o seu voto...

Thiago Da Silva Maneiro presentou o epitafio máis poético.

Ainoa Pereira Silva presentou o epitafio máis divertido.

Alexia Rey Bardanca, presentou o epitafio máis terrorífico.

Berta Lema Calo e Fátima Lado Vilaboa presentaron os epitafios máis artísticos.

Podedes velos neste vídeo:

 

Moitos parabéns a todas as persoas que ... 

"non tivestes medo de participar"...