luns, 29 de novembro de 2021

martes, 9 de novembro de 2021

CONCURSO DE CHÍOS / TWEETS CONTRA A VIOLENCIA DE XÉNERO


Durante o que queda de mes, até o día 30 de novembro, a Biblioteca convoca un concurso de chíos / tweets de 140 caracteres, como máximo, que rexeiten e/ou condenen a violencia de xénero. O formato é libre: poden ser frases, diálogos, versos, haikus, microrrelatos, etc. O 25 de novembro é o Día Internacional da Eliminación da Violencia contra as Mulleres e propoñémosvos esta pequena actividade. 
Haberá un agasallo para os chíos/tweets participantes e para os premiados un bono nunha tenda de informática.
 


  As bases do concurso son:

1.- Pode presentarse todo o alumnado que estea matriculado neste curso 2021-2022 no IES Terra de Xallas.

2.- Cada alumna ou alumno poderá presentar só UN TEXTO.

3.- Os textos deben conter como MÁXIMO 140 caracteres (os espazos entre as palabras contan como caracteres).

4.- Os chíos (tweets) versarán sobre a violencia de xénero. O formato será libre. Poderán conter frases, diálogos, haikus, greguerías, microrrelatos, ou calquera outra forma de expresión artística escrita. Deben potenciar a sensibilización fronte á violencia de xénero e expresar o rexeitamento e condena a esta forma de violencia.

5.- Valorarase a orixinalidade, o estilo, a redacción e o impacto da mensaxe.

6.- Estableceranse TRES CATEGORÍAS:

  • 1º ESO e 2º ESO, FP Básica.

  • 3º ESO, 4º ESO e Ciclos Formativos de Grao Medio.

  • 1º BAC, 2º BAC e Ciclos Formativos de Grao superior.

7.- O prazo para a presentación dos textos será até o 30 de novembro ás 23:59.

8.- Os textos enviaranse por correo electrónico (bibliotecaxallas@gmail.com) ou depositaranse na Biblioteca.

9.- Haberá UN PREMIO por nivel.

10.- O xurado resérvase a posibilidade de outorgar algún accésit ou declarar desertos os premios.

11.- O xurado estará formado polo Grupo da Biblioteca: Sabela Aldrey Dono, Cristina Durán Arufe, Soledad Fernández Gago, Mª Dolores Rodríguez Calo, Anxos Sanmartín Rei e Inma Rodríguez Villar.

12.- O xurado dará a coñecer os textos premiados o venres 10 de decembro na Biblioteca durante o 2º recreo nun acto aberto a todas as/os participantes. Posteriormente publicaranse os nomes das persoas premiadas na web http://bibliotecaxallas.blogspot.com e en instagram bibliotecaxallas.


 


mércores, 27 de outubro de 2021

Día das Bibliotecas e Samaín

 


O día 24 de outubro celébrase o Día das Bibliotecas e nós, esta semana, decoramos a nosa 'de Samaín'. Xuntamos as dúas celebracións nunha proposta:

Que veñades ler un conto de medo á biblioteca durante os recreos. Fixemos unha selección, mais na biblioteca sempre son ben recibidas as vosas suxestións. Hai algún libro que che provocase 'terror' ou 'pánico' e non está aquí? Nese caso, haberá que incluílo tamén.

É tempo de lecturas terroríficas...


 








venres, 22 de outubro de 2021


 Comezamos o curso 2021-2022 xa hai un mes!! E esta semana, o día 18 de outubro  celebrouse o 'Día das escritoras'. Así que comezamos ... lendo!! Porque non queremos deixar de achegarvos esta selección de textos que nos propoñen desde a Asesoría de Bibliotecas Escolares de Galiza, onde se recollen fragmentos de obras de Begoña Caamaño, Rosalía de Castro, Xela Arias, Eva Mejuto, Emma Pedreira e moitas outras escritoras galegas. Gozade da súa lectura!!!

 Enlace aos textos de escritoras galegas 2021

luns, 31 de maio de 2021

Fanzines para o verán!

 

 

A semana pasada estivo no noso centro unha ex-alumna, Eva. Trouxo varios fanzines para amosárvolos e para animarvos a coñecelos e a realizar este verán algún con ela. É posíbel que através do Concello de Santa Comba teñades esta proposta nun curso/obradoiro.

Un fanzine é unha 'revista' (di o dicionario da RAE) 'feita con poucos medios por afeccionadas e afeccionados a temas (diversos) como a música, o cine, a ciencia ficción, etc.' Calquera tema pode inspirar un fanzine, como os que nos trouxo Eva. So hai que pensar nun e atreverse a confeccionalo. Pode ser de forma individual, xunto con alguén ou en grupo.

Déixovos algunhas fotografías dos que nos trouxo para que teñades unha idea.





Calquera tema vale para facer un fanzine. Este vai de pintadas nas rúas de Compostela.



Pódense contar historias con debuxos



Ou pódense expresar emocións con versos

Con viñetas coma estas, é posíbel ilustrar unha idea que compartir

Tamé poden incluirse pequenos relatos

As posibilidades son tantas como imaxinemos!! Talvez o vindeiro curso poidamos realizar algún!!



xoves, 6 de maio de 2021

17 de maio: Día das Letras Galegas.



""Benvida, tripulación!
Estades no peirao da Real Academia Galega, base principal do Primavera das Letras, un buque ao que cada ano soben milleiros de nenos e nenas cunha misión: coñecer a protagonista do Día das Letras Galegas....""
http://primaveradasletras.gal/

Así comeza unha das seccions da web da Academia Galega, promotora, cada ano, en difundir a obra dunha galega ou dun galego, importante para a nosa lingua, para na nosa cultura. Este ano dedícase a unha poeta, tradutora e mestra, 

XELA ARIAS. 

Pois..., non sei se o sabedes, mais... Xela comezou a dar aulas no noso instituto. En Intempestiva. Unha biografía (literaria) de Xela Arias escrita por Montse Penas aparece isto:


Como todos os anos, hai moita información sobre a homenaxeada. Propómosvos comezar a viaxe coñecendo quen foi esta muller neste "Telexornal de ficción", realizado polo CPI Plurilingüe dos DIces, Rois:

No seguinte enlace á web do IES San Paio podedes ver unha "Cronoxeliña", unha liña do tempo sobre a súa vida: Cronoxeliña. E despois poderedes completar este encrucillado sen problemas: Encrucillado.

No IES Concepción Arenal realizaron esta presentación con moita información sobre Xela Arias: Presentación.

En varias webs podedes atopar moita información sobre esta autora. Deixamos varios enlaces para coñecer a súa biografía e a súa obra.

 Biografía, Biografía

Obra, Obra, Intempériome, Darío a diario, Poemas de Xela Arias noutras voces

Xela tradutora e editora 

Entrevistas, Outros textos

6 Videos da súa biografía, Imaxes

A súa voz 

 Na biblioteca tedes este volume onde está toda a súa obra, Xela Arias. Poesía reunida (1982-2004) de Mª Xesús Nogueira.

 Tamén podemos escoitar algúns dos seus poemas en diferentes versións musicais. Aquí tedes algúns exemplos de A banda da Loba, Margarida Mariño ou Germán Son:


 


 


xoves, 22 de abril de 2021

23 DE ABRIL, DÍA MUNDIAL DO LIBRO

 

Xoana Almar realizou este mural en setembro de 2020 no marco de Delas Fest, un festival de arte urbana con perspectiva de xénero. Podemos velo en Compostela, nunha parede do complexo deportivo de Santa Isabel. É unha lavandeira descansando, cun libro na man!! Unha imaxe para lembrar este 23 de abril de 2021.

E algunhas palabras de escritoras e escritores sobre os libros e a lectura:

Mia Couto: “ Parecen debuxos, mais dentro das letras están as voces. Cada páxina é unha caixa infinita de voces”. 

“ Ler é sempre un traslado, unha viaxe, un irse para atoparse”, di Antonio Basanta. 

Siri Hustvedt: “Os signos inertes dun alfabeto vólvense significados cheos de vida na mente”.

E Xela Arias: "Ler poesía coma quen se planta nun monte a respira-lo osíxeno, sen máis aparato crítico cós pulmóns mesmos..."

E iso son os libros: caixas cheas de voces que nos contan relatos, que nos levan de viaxe, que nos fan rir, que nos emocionan, que nos fan pensar… Un ano máis celebramos que os libros nos acompañan nas nosas vidas. E para acompañarnos, temos novos libros na Biblioteca do centro.